Sho ta yamukula omishangwa dhomiikundaneki, omupelesitende Netumbo Nandi-Ndaitwah okwa popi nena kutya oyana ye kayena ohokwe momahooli kutya omeukililo nenge oku pitila moohandimwe.
Shika oshe ya konima oshifo sho The Namibian sha shanga kutya omupelesitende oku liwe mokashoko sho taku ti aakwanezimo yomupelesitende oyena ohokwe momahooli.
Pethimbo ali ta patulula okabinete kiilonga yomuvo gwo 2026 mOmaandaha, omutoolonkundana Jemima Beukes okwali a pula Nandi-Ndaitwah ngele sho takuti aakwanezimo ye oya kwatako omahooli moshilongo, oshili.
Epulo lya Beukes olyali lya etithwa konima omupelesitende ali a tula iiniwe ayihe yomahooli kohi yombelewa ye omuvo gwa piti, ethimbo efupi sho a ningi omupelesitende.
Shika oshali sha etitha Beukes a tidhwe mo moshituthi shoka shali kegumbo lyopashiwana.
Netumbo kali a yamukula epulo sho ta ti kashali ethimbo lyomapulo ihe oshali ethimbo lyoku ithaneka.