Omukengeli omu British gwedhina Sir Benjamin Slade (79) ota kongo omukadhona omugundjuka opo ya vale okanona kokamati hoka taka ka thigululepo eliko lye uuna a huluko.
Sir Benjamin ngoka i itulamo noonkondo okwa hala uuthiga we u kale mombinzi.
Okwa hala wo ina kanitha 40% dheliko lye ko tax yuuthiga ndjoka hayi tulwa miilonga uuna to thigululwa komuntu keshi omunona gwoye.
Etseyitho lye olya nywitha omatsi ogendji sho a gandja omaukwatya gomukiintu ngoka a hala.
Sir Benjamin okwa hala omukiintu e li pokati komivo 30 no 40, gwomuthika oometa 1.68.
Otati yo okwa hala omukiintu a dheulwa oku umba oshifufuta, ena omukanda gwiifufuta iifupi (eembistoli) .
Na kale yo ena omukanda gwokuhinga iihauto. Omukanda gwo ku hinga omadhakadhaka otagu gwedha kompito yoku kuthwapo ( added advantage).
Okwati yo okwa hala omuntu ena uulongelwe miikwaveta (law) nenge momayalulo (accounting) opo a vule oku kwatela komeho iilalakanenwa yongeshefa yezimo.
Omanga e li he yokanona kadhona hoka a pewa (surrogate), ooveta dha pamba oludhi lwoongeshefa dhe odha gama ombinga kokanona kokamati muuthiga gwomaliko nevi.
Etseyitho ndika olye mu ithanitha komapulaapulo ogendji kiikundaneki.
Sir Benjamin okwi ishangitha wo kepandja lyokukonga ohole lyo Tinder.